الموت للكابتشا! - MIna Mamdouh : web designer Egypt
recaptcha-example

الموت للكابتشا!

تسمع عن الكابتشا؟ هي البتاعة اللي بتجبرك تكتب حروف وارقام لما تيجي تسجل في موقع مثلا عشان الموقع يتأكد انك انسان حقيقي مش برنامج قاعد يسجل في الموقع حسابات وهمية عشان يعمل حاجات قليلة الادب (سبام وارسال اعلانات والحوارات دي، متسرحش بعيد :)).

الكابتشا اللعين. بزمّتك قادر تقرأ المكتوب؟

للأسف الكابتشا ده هو لعنة الانترنت. كتير قوي بيظهرلي اشكال غريبة لا تمت للحروف او الارقام في اي لغة من لغات الانسان بصلة، وبقعد احاول مليون مرة بدون فايدة. آكره حياتي وانا قاعد اركز في كل شكل عشان افك شفرته واخمن ده يطلع ايه في لغة البشر، وطول الوقت عمال اشيل ذنوب من كتر الشتيمة في الكابتشا والانترنت وسنينه والدنيا كلها.

اوقات كتير بشتري اعصابي وصحتي واقفل الموقع اللي مش عارف استخدمه بسبب الكابتشا، وده شيء فعلا يحزّن.

واخيرا في شركة انا بدعيلها من كل قلبي لقو حل للمأساة دي: طريقة المواقع تتأكد بيها انك انسان ولكن من غير ما تتسببلك في انهيار عصبي، يعني من غير كابتشا.

شركة PlayThru ابتكرو طريقة يبدلو بيها الكابتشا بالعاب بسيطة وجميلة على شكل فوازير لازم تحلها عشان الموقع يتأكد انك انسان. طبعا دي حاجة عبقرية لأن الموقع بينال اللي هو عاوزه وانت بتتسلى في نفس الوقت وتستمر الحياة في سلام ووئام.

اتفرج عالنظام الجديد هنا وقول ايه رأيك. عجبك ولا الكابتشا احسن؟

المصدر: http://bit.ly/NXoncV وشكرا لمنسي

  Clef two-factor authentication